दुर्गाष्टोत्तरशतनामस्तोत्रम्

ईश्वर उवाच — ईश्वर ने कहा Īśvara said

शतनाम प्रवक्ष्यामि शृणुष्व कमलानने ।
यस्य प्रसादमात्रेण दुर्गा प्रीता भवेत् सती ॥ १ ॥

śatanāma pravakṣyāmi śṛṇuṣva kamalānane
yasya prasādamātreṇa durgā prītā bhavet satī

ॐ सती साध्वी भवप्रीता भवानी भवमोचनी ।
आर्या दुर्गा जया चाद्या त्रिनेत्रा शूलधारिणी ॥ २ ॥

oṃ satī sādhvī bhavaprītā bhavānī bhavamocanī
āryā durgā jayā cādyā trinetrā śūladhāriṇī

पिनाकधारिणी चित्रा चण्डघण्टा महातपाः ।
मनो बुद्धिरहंकारा चित्तरूपा चिता चितिः ॥ ३ ॥

pinākadhāriṇī citrā caṇḍaghaṇṭā mahātapāḥ
mano buddhirahaṃkārā cittarūpā citā citiḥ

सर्वमन्त्रमयी सत्ता सत्यानन्द स्वरूपिणी ।
अनन्ता भाविनी भाव्या भव्याभव्या सदागतिः ॥ ४ ॥

sarvamantramayī sattā satyānanda svarūpiṇī
anantā bhāvinī bhāvyā bhavyābhavyā sadāgatiḥ

शाम्भवी देवमाता च चिन्ता रत्नप्रिया सदा ।
सर्वविद्या दक्षकन्या दक्षयज्ञविनाशिनी ॥ ५ ॥

śāmbhavī devamātā ca cintā ratnapriyā sadā
sarvavidyā dakṣakanyā dakṣayajñavināśinī

अपर्णानेकवर्णा च पाटला पाटलावती ।
पट्टाम्बरपरीधाना कलमञ्जीररञ्जिनी ॥ ६ ॥

aparṇānekavarṇā ca pāṭalā pāṭalāvatī
paṭṭāmbaraparīdhānā kalamañjīrarañjinī

अमेयविक्रमा क्रूरा सुन्दरी सुरसुन्दरी ।
वनदुर्गा च मातङ्गी मतङ्गमुनिपूजिता ॥ ७ ॥

ameyavikramā krūrā sundarī surasundarī
vanadurgā ca mātaṅgī mataṅgamunipūjitā

ब्राह्मी माहेश्वरी चैन्द्री कौमारी वैष्णवी तथा ।
चामुण्डा चैव वाराही लक्ष्मीश्च पुरुषाकृतिः ॥ ८ ॥

brāhmī māheśvarī caindrī kaumārī vaiṣṇavī tathā
cāmuṇḍā caiva vārāhī lakṣmīśca puruṣākṛtiḥ

विमलोत्कर्षिणी ज्ञाना क्रिया नित्या च बुद्धिदा ।
बहुला बहुलप्रेमा सर्ववाहन वाहना ॥ ९ ॥

vimalotkarṣiṇī jñānā kriyā nityā ca buddhidā
bahulā bahulapremā sarvavāhana vāhanā

निशुम्भशुम्भहननी महिषासुरमर्दिनी ।
मधुकैटभहन्त्री च चण्डमुण्डविनाशिनी ॥ १० ॥

niśumbhaśumbhahananī mahiṣāsuramardinī
madhukaiṭabhahantrī ca caṇḍamuṇḍavināśinī

सर्वासुरविनाशा च सर्वदानवघातिनी ।
सर्वशास्त्रमयी सत्या सर्वास्त्रधारिणी तथा ॥ ११ ॥

sarvāsuravināśā ca sarvadānavaghātinī
sarvaśāstramayī satyā sarvāstradhāriṇī tathā

अनेकशस्त्रहस्ता च अनेकास्त्रस्य धारिणी ।
कुमारी चैककन्या च कैशोरी युवती यतिः ॥ १२ ॥

anekaśastrahastā ca anekāstrasya dhāriṇī
kumārī caikakanyā ca kaiśorī yuvatī yatiḥ

अप्रौढा चैव प्रौढा च वृद्धमाता बलप्रदा ।
महोदरी मुक्तकेशी घोररूपा महाबला ॥ १३ ॥

aprauḍhā caiva prauḍhā ca vṛddhamātā balapradā
mahodarī muktakeśī ghorarūpā mahābalā

अग्निज्वाला रौद्रमुखी कालरात्रिस्तपस्विनी ।
नारायणी भद्रकाली विष्णुमाया जलोदरी ॥ १४ ॥

agnijvālā raudramukhī kālarātristapasvinī
nārāyaṇī bhadrakālī viṣṇumāyā jalodarī

शिवदूती कराली च अनन्ता परमेश्वरी ।
कात्यायनी च सावित्री प्रत्यक्षा ब्रह्मवादिनी ॥ १५ ॥

śivadūtī karālī ca anantā parameśvarī
kātyāyanī ca sāvitrī pratyakṣā brahmavādinī

य इदं प्रपठेन्नित्यं दुर्गानामशताष्टकम् ।
नासाध्यं विद्यते देवि त्रिषु लोकेषु पार्वति ॥ १६ ॥

ya idaṃ prapaṭhennityaṃ durgānāmaśatāṣṭakam
nāsādhyaṃ vidyate devi triṣu lokeṣu pārvati

धनं धान्यं सुतं जायां हयं हस्तिनमेव च ।
चतुर्वर्गं तथा चान्ते लभेन्मुक्तिं च शाश्वतीम् ॥ १७ ॥

dhanaṃ dhānyaṃ sutaṃ jāyāṃ hayaṃ hastinameva ca
caturvargaṃ tathā cānte labhenmuktiṃ ca śāśvatīm

कुमारीं पूजयित्वा तु ध्यात्वा देवीं सुरेश्वरीम् ।
पूजयेत् परया भक्त्या पठेन्नामशताष्टकम् ॥ १८ ॥

kumārīṃ pūjayitvā tu dhyātvā devīṃ sureśvarīm
pūjayet parayā bhaktyā paṭhennāmaśatāṣṭakam

तस्य सिद्धिर्भवेद् देवि सर्वैः सुरवरैरपि ।
राजानो दासतां यान्ति राज्यश्रियमवाप्नुयात् ॥ १९ ॥

tasya siddhirbhaved devi sarvaiḥ suravarairapi
rājāno dāsatāṃ yānti rājyaśriyamavāpnuyāt

गोरोचनालक्तककुङ्कुमेन सिन्दूरकर्पूरमधुत्रयेण ।
विलिख्य यन्त्रं विधिना विधिज्ञो भवेत् सदा धारयते पुरारिः ॥ २० ॥

gorocanālaktakakuṅkumena sindūrakarpūramadhutrayeṇa
vilikhya yantraṃ vidhinā vidhijño bhavet sadā dhārayate purāriḥ

भौमावास्यानिशामग्रे चन्द्रे शतभिषां गते ।
विलिख्य प्रपठेत् स्तोत्रं स भवेत् सम्पदां पदम् ॥ २१ ॥

bhaumāvāsyāniśāmagre candre śatabhiṣāṃ gate
vilikhya prapaṭhet stotraṃ sa bhavet sampadāṃ padam